Нацбанк Беларусі паведаміў, што з 31 сакавіка 2025 года ў абарачэнне паступяць памятныя банкноты і манеты. Гэта не проста калекцыйныя рэчы — імі можна будзе расплачвацца.
«Выпушчаныя ў абарачэнне манеты і банкноты — законны плацежны сродак Рэспублікі Беларусь і абавязковыя да прыёму па намінальным кошце пры ўсіх відах плацяжоў без усялякіх абмежаванняў», — падкрэсліваецца ў паведамленні.
Банкноты наміналам 80 рублёў надрукуюць у колькасці 80 000 штук. На адным баку купюры выяўленыя помнікі Другой сусветнай вайны: манумент «Мужнасць» у Брэсцкай крэпасці, скульптура «Радзіма-маці», а таксама беларускія архітэктурныя сімвалы. На абароце — вобраз маці і дзіцяці, арнамент, кветка яблыні і буслы на фоне «Брамы Мінска».
Таксама выпусцяць дзве памятныя манеты:
- сярэбраную наміналам 20 рублёў, масай 67,26 грама, пробай сплаву 925, дыяметрам 50 мм; тыраж складзе 2500 асобнікаў;
- медна-нікелевую наміналам 1 рубель, масай 57 грамаў, дыяметрам 50 мм; выпусцяць 5000 штук.
Манеты маюць круглую форму з рыфленым гуртом. На аверсе — рэльефная выява дзяржаўнага герба Рэспублікі Беларусь на фоне каласоў, кветак і неба, а таксама намінал і год чаканкі. На рэверсе выяўленыя стылізаваныя элементы ваеннай тэматыкі: кулявая адтуліна, званы, тэхніка на фоне руін і надпіс «80 год Перамогі». У ніжняй частцы — выява трох чырвоных гваздзікоў.