Сейм Літвы 14 студзеня ўхваліў прапанову пра дэнансацыю пагаднення з Беларуссю што да пазбягання двайнога падаткаабкладання даходаў і фіскальных парушэнняў, паведамляе Delfi.
За дэнансацыю пагаднення паміж урадамі Літвы і Беларусі пра пазбяганне двайнога падаткаабкладання даходаў і фіскальных парушэнняў, падпісанае ў Мінску 18 ліпеня 1995 года, прагаласавалі 111 літоўскіх парламентарыяў, супраць — 4, устрымаліся — 6.
Спыненне дзеяння пагаднення спыняе прымяненне яго артыкулаў, якія абмяжоўваюць магчымасць краін абкладаць падаткам даходы жыхароў ці кампаній, якія знаходзяцца на тэрыторыі іншага боку пагаднення.
Як тлумачыць Міністэрства фінансаў Літвы, якое ініцыявала дэнансацыю, паводле пагаднення грамадзяне Беларусі, якія атрымліваюць даходы ў Літве, мусілі абкладацца падаткам на льготных умовах. У той жа час Беларусь ужо не выкарыстоўвае гэты парадак, таму рэзідэнты Літвы там не будуць абкладацца падаткам па больш выгадных тарыфах.
Акрамя таго, як гаворыцца ў тлумачальнай запісцы да праекта, з 2022 года Літва не абменьваецца інфармацыяй з Беларуссю з падатковымі мэтамі. Скасаванне пагаднення прывядзе да павелічэння падаткаў, якія атрымліваюцца ад рэзідэнтаў Беларусі, бо замест дзеючых ставак падаходнага падатку з фізічных асоб або падатку на прыбытак арганізацый да 10% будуць прымяняцца стаўкі да 20%. Таксама пашырыцца падатковая база рэзідэнтаў Беларусі, якія атрымліваюць даходы з літоўскіх крыніц.
Рашэнне пра дэнансацыю пагаднення было прынятае з улікам супрацоўніцтва афіцыйнага Мінска з Расіяй, ваеннай агрэсіяй апошняй супраць Украіны і грубымі парушэннямі міжнароднага права. Падкрэсліваецца таксама, што цяпер адбываецца дэнансацыя аналагічнага пагаднення з Расіяй.
Нагадаем, раней Германія таксама паведаміла Беларусі пра прыпыненне з 1 студзеня 2025 года дзеяння пагаднення пра пазбяганне двайнога падаткаабкладання ў дачыненні да падаткаў на даходы і маёмасць. Гэта адказ на дзеянні Мінска.
Беларусь з 1 чэрвеня 2024 года прыпыніла выкананне некаторых міжнародных дамоваў пра пазбяганне падвойнага падаткаабкладання (яны дазваляюць унікаць сітуацыі, калі адны і тыя ж даходы падпадаюць пад падаткі ў дзвюх розных краінах). Тэрмін дзеяння гэтага рашэння Мінска — да 31 снежня 2026 года.
Пад абмежаванні трапілі тры палажэнні — пра дывідэнды, пра працэнты і пра даходы ад адчужэння маёмасці. У спіс краін, з якімі прыпыняецца выкананне некаторых палажэнняў міжнародных дамоваў, увайшлі ў тым ліку ЗША, Францыя, Данія, Польшча, Швецыя, Бельгія, Літва, Латвія, Нідэрланды, Чэхія, Германія, Вялікабрытанія. Агулам — 27 краін.
Чытайце таксама
