Вытворца каўбасных вырабаў з Брэсцкай вобласці «Прыбужжа Груп» распачаў працэдуру банкруцтва. Інфармацыя пра гэта размешчаная ў адзіным дзяржрэестры звестак пра банкруцтва.
Вытворца каўбасных вырабаў пад маркай Miednowski збанкрутаваў. У пачатку года кампанія пачала працэс ліквідацыі.
Крэдыторская пазычанасць на момант суда склала 4,3 млн рублёў, вынікае з судовых дакументаў. Актывы кампаніі былі на ўзроўні 1,9 млн рублёў. Але гэта «віртуальныя» грошы — гэта пазычанасць перад «Прыбужжа Груп» брэсцкага мясакамбіната «Старфуд», які таксама нядаўна збанкрутаваў. Гэта азначае, што нават калі мясакамбінат з Брэста пагасіць доўг, то «Прыбужжа Груп» усё роўна не разлічыцца з крэдыторамі за кошт актываў.
Наступнае паседжанне па справе прызначанае на 16 верасня.
Кампанія «Прыбужжа Груп» працуе ў Беларусі з кастрычніка 2019 года. Прадпрыемства па вытворчасці каўбасы паводле польскіх рэцэптаў знаходзіцца ў аграгарадку Медна пад Брэстам. Кампанія сярод іншага выпускала паштэты, зельцы, каўбасы, рулеты, сасіскі і сардэлькі.
Чытайце таксама
