Мінспорту і турызму хоча ўнесці змены па прафатэстацыі экскурсаводаў і гідаў-перакладчыкаў. Для гэтых работнікаў хочуць пашырыць спіс прычын, з якіх фактычна могуць забараніць ажыццяўляць дзейнасць. У ведамстве заяўляюць, што прапановы чыноўнікаў звязаныя з барацьбой з рэабілітацыяй і адмаўленнем нацызму.
Што хочуць змяніць чыноўнікі
Як адзначаюць у Мінспорту, змены па прафесійнай атэстацыі экскурсаводаў і гідаў-перакладчыкаў вырашылі ўнесці пасля аналізу іх дзейнасці. Паводле звестак ведамства, некаторыя работнікі «дапускаюць негатыўныя выказванні ў дачыненні да цяперашняга дзяржаўнага ладу Беларусі».
«Дзейныя меры рэагавання з дапамогай пазбаўлення гэтых экскурсаводаў і гідаў-перакладчыкаў пасведчанняў пра атэстацыю паказваюць сваю эфектыўнасць: пасля выяўлення фактаў неадпаведнасці такіх асоб прафесійным і этычным
патрабаванням орган атэстацыі прымае адпаведныя рашэнні», — лічаць у Мінспорту.
У ведамстве мяркуюць, што гэтую працу трэба ўзмацніць — больш пільна праводзіць прафатэстацыю і пазбаўляць дакумента, патрэбнага для працы. У Мінспорту выступаюць «за ўзмацненне адказнасці як прэтэндэнтаў на этапе праходжання атэстацыі, так і дзейных экскурсаводаў і гідаў-перакладчыкаў».
Таму атэстацыйнай камісіі і яе сакратару хочуць пашырыць паўнамоцтвы. Цяпер сакратар запытвае ў органах унутраных справаў звесткі пра чалавека, які праходзіць атэстацыю, па акрэсленым пераліку парушэнняў, за якія прадугледжаныя адміністрацыйная або крымінальная адказнасць. Гэта робяць як у дачыненні да дзейных экскурсаводаў і гідаў-перакладчыкаў, так і ў дачыненні да прэтэндэнтаў на такія пазіцыі.
Цяпер жа прапануецца павялічыць спіс парушэнняў, па якіх сакратар будзе запытваць такія звесткі. Яго хочуць пашырыць артыкуламі 130−1 і 130−2 Крымінальнага кодэкса (яны датычаць рэабілітацыі і адмаўлення нацызму). Наяўнасць такіх парушэнняў пацягне неатэстацыю работніка.
«Гэтыя меры скіраваныя на прафілактычную працу з экскурсаводамі і гідамі-перакладчыкамі і закліканыя ўзмацніць іх адказнасць у мэтах недапушчэння скажэння фактаў гісторыі ў перыяд Вялікай Айчыннай вайны», — адзначаюць у Мінспорту.
Якія змены для экскурсаводаў і гідаў ужо ўвялі і навошта спатрэбіліся новыя
У Мінспорту нагадваюць, што ў ліпені 2023 года ведамства акрэсліла прафесійныя і этычныя патрабаванні да экскурсаводаў і гідаў-перакладчыкаў. Праз гэта ў краіне ўзнік недахоп такіх спецыялістаў.
Летась сярод іншага было ўведзенае патрабаванне, паводле якога неабходна падчас экскурсіі мець пры сабе бэйдж і пералік тэм экскурсій, па якіх пройдзеная атэстацыя. І не варта дапускаць некарэктныя выказванні пра Беларусь. Так, ад экскурсаводаў і гідаў-перакладчыкаў патрабуецца «фармаваць уяўленне пра Беларусь як пра краіну, прывабную для турыстаў, экскурсантаў». Таксама нельга дапускаць на экскурсіях суб’ектыўныя некарэктныя ацэнкі і выказванні пра Беларусь і іншыя краіны. Неабходна «прымаць меры па недапушчэнні з боку турыстаў, экскурсантаў ці іншых асоб некарэктных, правакацыйных і іншых негатыўных выказванняў або дзеянняў».
Аднак гэтых патрабаванняў, як лічаць у Мінспорту, недастаткова, а работнікі павінныя больш «праяўляць павагі да гісторыі беларускай дзяржаўнасці».
«У той жа час дзейнасць экскурсаводаў і гідаў-перакладчыкаў уяўляе сабой працу з фактамі, — адзначае ведамства ў абгрунтаванні да законапраекта. — Таму такія асобы ў сілу сваіх прафесійных і этычных патрабаванняў абавязаныя выказваць павагу да гісторыі развіцця беларускай дзяржаўнасці, як і фармаваць уяўленне пра Рэспубліку Беларусь як пра краіну, прывабную для турыстаў і экскурсантаў, не дапускаючы суб’ектыўных некарэктных выказванняў пра краіну».
Чытайце таксама
