Ігар Брыло вызвалены ад пасады памочніка Лукашэнкі — інспектара па Віцебскай вобласці.
Ва ўказе паведамляецца, што Брыло знялі з пасады «ў сувязі з учыненнем правіны, несумяшчальнай са знаходжаннем на дзяржаўнай цывільнай службе». Дакумент быў падпісаны 27 лістапада.
Раней «Наша Ніва «са спасылкай на свае крыніцы паведамляла пра тое, што Ігар Брыло быў, як мяркуецца, затрыманы па «малочнай справе», фігурантам якога стаў і гендырэктар магілёўскага ААТ «Бабуліна крынка» Генадзь Скітаў.
Суразмоўцы «Нашай Нівы» ў Барысаве расказалі: калі Скітаў кіраваў Барысаўскім мясакамбінатам, Брыло быў яго падначаленым. Ён працаваў там ветэрынарам пасля заканчэння Віцебскай ветэрынарнай акадэміі. Гэтая інфармацыя пацвярджаецца выпіскамі з базаў «Белпола».
Нагадаем, да прызначэння памочнікам Лукашэнкі па Віцебскай вобласці Брыло быў міністрам сельскай гаспадаркі і харчавання. У крэсле ён прабыў крыху больш за год. Новым кіраўніком Мінсельгасхарча прызначылі Сяргея Барташа.
Пасля кадравых перастановак Лукашэнка раіў Брыло не ўспрымаць пераезд у Віцебск як высылку.
— Табе, Ігар, я ўжо казаў. Калі ты гэта ўспрымаеш як высылку — гэта твае праблемы. Вам трэба прайсці гэты этап. І калі ты там возьмешся моцна, то і вынік будзе і для цябе асабіста будзе вельмі карысны вынік. Як вучоны чалавек, як ідэалагічны работнік ад практыкі ты гэтыя дадзеныя маеш. Цяпер трэба зазямляцца, калі ты думаеш далей працаваць. Табе да пенсіі — як да Госпада Бога. Таму трэба запрагацца і паказваць вынік. Гэта мая табе прапанова, — даў наказ Лукашэнка.
Чытайце таксама
