Чыноўнікі хочуць у 2023 годзе падняць падаходны падатак для некаторых фізічных асобаў. Павышэнне прадугледжанае праектам зменаў у Падатковы кодэкс.
Для каго з фізічных асобаў збіраюцца павысіць падаходны падатак
У 2023 годзе чыноўнікі хочуць падняць падатак на перавышэнне выдаткаў над даходамі — да 26%. Цяпер гэты збор, які спаганяюць з сумы перавышэння, складае 20%. Апошні раз яго падымалі ў пачатку гэтага года, да гэтага падатак быў на ўзроўні 16%.
З 20% да 26% таксама збіраюцца падняць падаходны падатак за заробкі ў канвертах. Збор у 26% таксама хочуць усталяваць для тых, хто ў спецыяльнай камп’ютарнай касавай сістэме зарэгіструе даход ад выйгрышу (вернутых ставак, якія не сыгралі), калі пры гэтым фактычна выплаты выйгрышу не было. Цяпер гэты падатак складае 20%.
Нагадаем, з ліпеня 2017 года падаткавікі могуць супастаўляць сумы выдаткаў і даходаў фізасобы як за 10 апошніх поўных каляндарных гадоў, так і за мінулы перыяд гэтага года. Пры гэтым у іх мусіць быць інфармацыя аб перавышэнні кошту маёмасці і выдаткаў над даходамі, якія паступілі з законных крыніц, на суму не менш чым 500 базавых велічынь (цяпер гэта 16 000 рублёў). Тут ёсць важны момант: такое перавышэнне можа «набегчы» за некалькі гадоў агулам, і гэта можа стаць падставай для праверкі падатковай.
Якія падаткі хочуць падняць для тых, хто займаецца прадпрымальніцтвам
Падаходны падатак у 26% таксама хочуць увесці для фізічных асобаў, якія займаюцца прадпрымальніцтвам без дзяржрэгістрацыі або незаконнай дзейнасцю як ІП.
Таксама чыноўнікі збіраюцца падняць стаўку падаходнага падатку з фізічных асобаў у дачыненні да даходаў, які атрымліваюць ІП, натарыусы ад ажыццяўлення адпаведнай дзейнасці. Цяпер гэты збор складае 16%, яго хочуць павысіць да 20%.
Удакладнім, што гэтыя магчымыя падатковыя змены яшчэ не прынятыя. Пры гэтым зацверджаны канчатковы варыянт правак чыноўнікаў у Падатковы кодэкс можа адрознівацца ад папярэдніх версій правак у гэты дакумент.
